Sondag Kopies

Sjoe, ek was lanklaas hier. Dis baie stil hier op die Landgoed en hier gebeur nie eintlik iets nie. Terwyl ek nou my inkopies laat aflewer is die nuus nog minder. Dit pas egter my persoonlikheid en ek is heel tevrede en gelukkig.

Ek grawe nou die dag my matriek jaarboek uit en ‘n jaarboek van 1984 van my gunsteling skool. Eish… lekker herinnering kom na vore. Ek is vreeslik tevrede met my dun lyfie wat ek dadelik vir Emily my huishulp wys. Grinnik… haar reaksie was minder vleiend! Mens moes daardie jare alles doen. Jy bevraagteken geen besluit van die oppergesag nie. Daar staan ek trots by die Oop netbal spanne… daardie dogters het ek beslis ingedoen, want ek weet tot vandag toe nog niks van netbal nie… “Sorry Girls!” Die atletiek was beter, maar sport was/is nie regtig hoog op my belangstellinglys nie. Dis lekker om hierdie kinders op te soek en te kyk hoe hulle lewens verloop. Dis soms lekker om so in die verlede rond te grawe, maar tog moet mens nie dat dit jou hele lewe oorneem, want mens is veiliger in die hede.

Ek hoop daar is iets vir jou wenslysie. Dankie vir die inloer. Bly glimlag… dit help nie baie, maar troos darem.

Neeeeee… ek sukkel al meer as ‘n uur om foto’s op te laai. Hierdie nuwe formaat werk net nie vir my nie …

Sondag kopies

Sjoe, ek was lanklaas hier. Ek sukkel nog maar met die formaat… dalk word ek oud of dom. Is jy al gemaklik met die nuwe formaat? Veral die oplaai van foto’s is ongemaklik. Tog kom ek deel ‘n paar grappies om jou op te kikker.

‘n Bejaarde egpaar het op ‘n bootreis gegaan en dit was baie stormagtig op see. Hulle het agter op die dek gestaan en kyk na die storm toe ‘n reuse golf die skip tref en die ou man oorboord spoel. Hulle het vir dae na hom gesoek maar kon niks kry nie en die kaptein het die vrou terug land toe gestuur.

Drie weke het verbygegaan en uiteindelik het die ou dame ‘n faks van die Kuswag af gekry wat lui: ‘Mevrou, ons is jammer om u in kennis te moet stel dat ons u man se liggaam op die seebodem opgespoor het. Ons het hom opgetrek tot op die dek en aan hom het daar ‘n oester vasgesit waarin daar ‘n pêrel met geraamde waarde van R1 000 000 was. Laat weet asseblief wat ons moet doen.’

Die ou dame het teruggefaks: ‘Stuur vir my die pêrel en laat sak weer die lokaas!’

*****

“Oupa, ek sien oupa het ook geleer om oupa se hand voor oupa se mond te hou as oupa nies” “Natuurlik my kind – hoe moet ek anders keer dat my tande op die grond val!”

*****

Die oggend met ontbyt kla die een tante van die ouetehuis dat sy nie ‘n oog kon toemaak nie omdat ‘n jong man die hele nag aan haar deur bly hamer het. “Hoekom het jy nie die deur vir hom oopgemaak nie?” vra haar vriendin. “Is jy mal? Dan sou hy mos uitgegaan het!”

Dankie vir jou inloer. Ek hoop jy kry ietsie vir jou wenslysie. Ek hoop jy is gesond en dat jy elke dag iets kry om iets oor te glimlag.