Sondag Kopies

As jy nie van ‘n gekerm hou nie moet jy nie verder lees nie. Ek is so gefrustreerd dat ek my polse wil afkou. Iemand of Tinatjie self het die deuntjie …

We wish you a Merry Christmas
We wish you a Merry Christmas
We wish you a Merry Christmas and a happy New Year

… op my foon afgelaai. Dit speel nou op die onmoontlikste tye en as ek op my foon kyk is daar niks. Dit gebeur egter net in die nag. Donderdagnag 02:00 Vanoggend 04:45 en 06:45. Ek soek en soek en soek, maar kry dit nie. Ek vee uit en vee uit, sit aan en af… maar geen reaksie. Eish … ek is radeloos. Wag laat ek liewer ophou.

Ek hoop jy het die allermooiste Kersfees gehad. Dankie vir die inloer. Ek hoop daar is darem iets oor vir jou wenslysie vir die nuwe jaar. Onthou om te glimlag.

 

Vrydag Byskrifte

Ai, ek is so bly ek leef in ‘n tyd waar baie goed ons lewens beter en makliker maak. Ek was gister op ‘n wildsplaas en het weereens besef hoe maklik ons lewens is. Die grond paadjies met die walle het ons langer geneem as die langer teerpad uit die dorp. ‘n Heerlike ou grasdak plaashuis met ‘n pragtige uitsig, het my in vervoering. Ek wonder net hoe op aarde hulle die boumateriaal so diep tussen die berge in gekry het. Daardie paadjies is beslis nie gemaak vir groot vragmotors nie. Aan die ander kant as die Voortrekkers oor die Drakensberge gekom het, (in vergelyking met die berge in Limpopo) is beslis ‘n wonderwerk.

Dankie vir die inloer/deelneem. Hoop jy het ‘n heerlike naweek met baie reën  en ‘n glimlag.

1

2

3

4

5

6

Sondag Kopies

Die meeste van my lesers weet ek hou nie regtig van rugby nie. Ek hou nie van die sweet en spoeg en die plekke waar hulle hul koppe indruk nie. Tog het hierdie 7’s my aandag gevang en ek geniet elke wedstryd. Ek het my altyd verwonder aan die ouers langs die veld wat hulle bloedjies aanspoor en soms sommer net wangedra … en wat sal die uwe nou doen? Ek het vir die nr. 9 van die vrouespan skoolgehou en hoewel hulle regtig nie goed speel nie, praat ek nou kliphard met die televisie. Jammer aan elke ouer, wat ek kwalik geneem het in die verlede. Maar wag … die manne speel teen Kenia nou! Laat ek ‘n koffietjie kry en lekker saam gesels. Ek is super trots.

Dankie vir die inloer. Ek hoop jy kry iets vir jou wenslysie. Hoop ook dat daar iets sal wees waaroor jy kan glimlag.

 

 

 

 

 

 

Vrydag Byskrifte

Sjoe, ek was lanklaas hier. Die lewe loop vinnig aan.

‘n Advertensie is nogal iets wat my aandag trek. Ek is baie visueel en soek altyd na iets moois en interessant. Daar is egter tans ‘n insinking en naas die ou Allen Grey een, geen een wat ‘n gunsteling is. Snaaks dat hulle nie gebruik maak van beurtkrag nie.  Iets wat my egter grensloos irriteer is die Volkswagen advertensie… dit lyk of hulle ‘n game speel wat ek nie ken nie, maar dit sê niks van die kar nie? Nee wat, hulle kan dit maar afhaal. Ek mis ‘n oulike Nando of Virseker advertensie… dalk gaan ek lank wag.

Dankie vir die inloer/deelneem. Onthou om te glimlag en geniet die lang naweek.

1

2

3

4

5

6

Sondag Kopies

Televisiereeksvervaardigers (Eish…lang woord) laat my baie keer glimlag, wanneer hulle die gehoor onderskat. Goed, ek word ook soms geflous, maar regtig? So verskyn ‘n oënskynlik poedelkaal poppie in Trackers Sy staan doodluiters in die kombuis in die middel van die dag en is besig met ‘n ernstige gesprek! Draai sy na ‘n reg van voor aansig, en sien mens daar is ‘n driehoek op die strategiese plek. REGTIG!? Eish, dit verander geen feit van die storie nie. Nee, wat ek het geen probleem met met naaktheid as dit bydra tot die storie nie, maar die was sommer sinneloos. Ook maar goed dat die reeks klaar is, want elke week skiet hulle ‘n klomp van die karakters dood dat daar later nie meer ‘n storie oor is nie.

Dankie vir die inloer en ek hoop jy kry iets vir jou wenslysie. Hoop jy het ‘n wonderlike week en dat jy sal glimlag.