Sondag Kopies

Die lewe is nie vir sissies nie! Ek het so tyd gelede vertel van die dood van ‘my’ onkoloog. Vrydag kry ek ‘n onverwagte telefoonoproep van ‘n dame wat my formeel meedeel dat Dr. M. se praktyk die einde van die maand finaal sluit en ek moet kies of my lêer na Dr. J. of Dr. (naam waarvan ek nog nooit gehoor het) gestuur moet word. Ek is uit die veld geslaan en probeer uitvra, maar word meegedeel dat as ek nie een kies, ek maar Pretoria toe moet gaan.  Net so in die bestek van twee minute word ‘n hele paar dinge afgesluit. Die ondersoektafels, die ontvangkamer met die versies teen die muur en skilderye waarvan ek elke detail ken, die stoele en instrumente in die chemolokaal, die gangetjie na die bestralingslokaal … ens., ens.  Die hele ervaring word gereduseer na dun lêertjie in ‘n onbekende dokter se liaseerkabinet. Tog moet ek nie kla nie, want mense het meer verloor as ek. Werknemers het hulle werk verloor, kinders het herinneringe van geliefdes verloor en die dorp het nog ‘n spesialis verloor. So Tinatjie jy moet nie kla nie… die lewe gaan aan.

Dankie vir die inloer. Ek hoop jy kry ietsie vir jou wenslysie, maar dat jy ten minste sal glimlag.

 

Vrydag Byskrifte

Ai, om af te tree is darem een van die heel lekkerste dinge in die lewe. As mens werk lyk dit glad nie so aanloklik nie, want wat op aarde gaan jy doen, maar as jy daar is is dit lekkerder as lekker. Jy kan jou verlekker in klein dingetjies soos:

• Jy kan soggens veral in die winter lekker omdraai en die beddegoed optrek.

• As jy nie wil ry nie, dan doen jy so.

• Jy hoef nie ‘n verskoning uit te dink nie; jy sê vriendelik, maar beslis net “Nee dankie.”

• Jy kan eet, bad en drink wanneer jy wil.

• Jy kan rustig na ander luister sonder om te glo wat hulle sê en jy hoef hulle nie reg te help nie, want hulle gaan in elk geval vergeet.

Dankie vir die inloer/deelneem. Ek hoop die naweek is heerlik en jy moet onthou om warm te bly.

1

2

3

4

5

6

Sondag Kopies

Vanoggend se diens op RSG gaan oor vergenoegd wees. Dit het my laat besef hoe ‘n mens jou lewe ongelukkig kan maak deur altyd onvergenoegd oor alles en almal te wees.  Ek wil die res van my lewe my omring met positiewe mense en goed. Ek wil my besig hou met positiewe gedagtes en dinge wat my lewe beter maak. As iets verkeerd loop wil ek liewer kyk wat ek daaruit kan/moet leer en dan aan beweeg na iets beters. Ook wat betref ons land. Op hierdie stadium van my lewe is ek op die beste plek vir my. Afrika se chaos pas my persoonlikheid… die mense is interessant en ek gaan nie smag na iets of ‘n land wat ook maar met hulle eie probleme sit. Nêrens is hemel op aarde nie. As ander wil negatief wees, moet dit net nie op my voorstoep kom doen nie.

Die kopies was maak skraps die weet, maar ek hoop iets sal jou geval. Geniet die week. Hoop jy bly glimlag.

 

Vrydag Byskrifte

Die koue is uiteindelik hier. Ek hoop regtig die droogte word finaal verbreek die jaar. Ek weet nie of mens jou verbeel nie, maar die verlede was altyd kouer, natter, warmer of droeër as die jaar… of is dit maar soos die ouderdom met jou kop maak. Dis of alle byvoeglike naamwoorde verander, lekker is soms baaaaiiieeee lekkerder of groot is tog nie so groot nie. Is dit dalk maar jou brein wat vergeet het hoe lekker dit was as jy weet more is die eerste dag van ‘n hele 3 weke vakansie. Miskien is dit anders, omdat elke dag nou vakansie is? Aan alle onderwysers, kinders en almal vir wie dit raak wens ‘n ‘n mooi vakansie toe. Hoop julle rus goed uit en geniet die langer in die warm bed lê.

Dankie vir die inloer/deelneem. Geniet die lang naweek. Ek hoop jy is knus en warm en dat jy darem sal glimlag.

1

2

3

4

5

6

Sondag Kopies

Elke week versamel ek die kopies wat oor my pad kom Ek probeer ‘n verskeidenheid te plaas, maar gaan soek nie aktief na kopies nie. Natuurlik sluip persoonlike smaak ook elke keer in, maar dis interessant hoe die kopies van self na my toe kom. As mens ouer word verander jou behoeftes. Al die jare het jy klere gekoop om by jou beroep te pas. As jy aftree koop jy glad nie meer so klere nie en dra jy maklik dit wat jy het tot dit amper van jou lyf afval… net omdat jy daarvan hou en dit gemaklik is. ‘n Vriendin het die naweek ‘n uitstalling van juwele en ek het nie eers gaan kyk nie. Ek het al die jare ‘n silwer ring aan my linkerwysvinger gedra en toe ek my ringe nou die dag aanpas, lyk dit ongemaklik tussen die plooie en voue… sug … daardie tyd is vir altyd verby.

Ek hoop daar is iets na jou smaak die week, maar boweal dat jy ten minste sal glimlag.

 

 

 

 

 

Vrydag Byskrifte

Een van die grootste vrese wanneer mens ouer word is om te val. Kleuters hardloop en val en jol, maar staan maklik op en gaan weer aan. Oumense is egter so versigtig dat hulle aan mure klou, wat nie veel help nie want as jy val,  val jy, en terwyl jy val is jy so vies vir die liggaamsdeel wat jou laat neerslaan het.  Jy het ook altyd hulp nodig om weer op te staan en tussen die blou kolle en seerplekke is jou ego ook erg gekneus. Mense verstaan dit nie as jou voete en jou brein nie meer saamwerk nie. Sowaar oudword is nie vir sissies nie.

Baie dankie vir die inloer/deelneem. Ek hoop jy het ‘n heerlike naweek en dat jy sal onthou om te glimlag.

1

2

3

4

5

6

 

Sondag Kopies

Die winter is op ons… sug… hoe ouer ek word, hoe langer bly my voete koud.  Ek is maar stil en daarom is dit grappies vandag.

*Hierdie is ‘n dringende boodskap van die Nasionale Bevolkings
Registrateur:  “Jou geboorte was ‘n fout. Jy moet onmiddellik na jou naaste Kliniek gaan om uitgesit te word. Ons vra om verskoning vir enige ongerief!”

* Blond bel die brandweer en sê haar huis is aan die brand.
Die man vra: Okay, hoe kom ons daar uit?     Sy sê: Hellooo!! Met die groot rooi lorrie!

’N TALENTSOEKER loop in die straat af waar hy ’n man en sy hondjie teëkom. Die hondjie is besig om te sing — alte pragtig! Die talentsoeker is so verstom dat hy ’n hele paar oomblikke lank sy oë staan en knip om seker te maak dat hy nie droom nie. ”Kom asseblief na my kantoor toe,” pleit hy by die jong hond se baas toe hy tot verhaal kom. ”Ek wil ’n kontrak met jou en hierdie wonderlike hondjie sluit.” Die man bring dus sy hond na die talentsoeker se kantoor. Die hondjie is net besig om die laaste paar note van La Donna E’ Mobile te sing (en soos Luciano Pavarotti te klink), toe ’n groot teefhond die kantoor binnebars en die hondjie aan sy nekvel beetkry. Daarna hardloop sy by die deur uit terwyl sy hom in haar bek dra. Die man trek sy skouers op en sug. ”Dit help nie,” sê hy, ”dis sy ma daardie. Sy weier dat hy ’n loopbaan in die vermaaklikheidswêreld volg. Sy wil hê hy moet ’n dokter word.”  

Dankie vir die inloer. Ek hoop daar is iets vir jou wenslysie, maar dat jy tenminste sal glimlag.