Fotografie 2

Hierdie is vir die slimmer vriende, want my kop is plat as die bt spieëls kom.  In die sorgsentrum is die haarsalon in ‘n kleinerige vertrek.  Daar is egter twee spieëls om die teenoorstaande mure met ‘n interessante effek.  Dit beteken as jy reg voor die een spieël sit, sien jy jou gesig en jou agterkop wat herhaal word tot op die boonste rand van die spieël.

My vraag is nou waar moet die fotograaf staan om hier die effek die beste raak te vang. As iemand die beginsel van hierdie verskynsel in eenvoudige taal verduidelik sal ek ook baie bly wees. As die fotograaf te naby aan die model of spieël staan, is jy ook op die foto?

Fotografie

Bietjie agtergrond vir nuwe vriende.  Nadat ek afgetree het, ontdek ek ‘n man op George wat ‘n beginnerkursus in fotografie aanbied – op die skool se webwerf nogal. Behalwe dat ek van plan was om diep opheffingswerk te gaan doen met die tyd op hande (‘n storie vir ‘n ander dag), word dit toe ‘n nuwe belangstelling. Een van die laaste opdragte was die fotografie van ‘n model. Drie uitrustings en verskillende ‘houdings’ was die opdrag.

Ek kry toe ‘n jong dame waarvoor ek skoolgehou het en huur ‘n kamer in ‘n gastehuis (met die 2010 sokker het Polokwane baie daarvan)  Ons het ‘n heerlike dag, baie pret en ek leer baie, want sy het modelwerk gedoen.  Met die verloop van tyd as ek met haar gesels sê altyd ek wil vreeslik graag weer foto’s van haar neem en verlede week stel sy voor sy sal Maandag kom. Ai, ek het net weer besef hoe lekker die fotografie-stokperdjie is. Ek deel graag ‘n paar foto’s van die pragtige jong vrou.

2010… Ek het raas gekry oor die eerste foto, want die liggaamsdeel naaste aan die kamera word vergroot en dis van ni9e vleiend nie.  Ek het die keer dit darem reggemaak.

 

 

Sondag Kopies

Ek hoop daar is iets vir jou wenslysie vandag. Dis ‘n heerlike dag hier op die landgoed … net vreemd warm vir die einde van Maart.

Dankie vir die inloer. Ek hoop hier is ten minste ‘n glimlag iewers versteek.

Uitstappie

Ek is in die laaste tyd pynlik bewus van die feit dat my foto’s nie regtig kan kers vashou ander fotograwe hier rond nie, maar ek deel graag ‘n paar, sodat my Sus wat die wildtuintjie goed ken, kan saam kyk.  Dit regtig mooi groen daar en en die waterdamme is propvol.  Mens is so dankbaar daarvoor.

Vrydag Byskrifte

Dis ‘n heerlike rustige naweek hier op die Landgoed. Die bouers is almal huis toe en hier is so salige stilte. Die inwoners is redelik voltallig, want as mens hier in die Noorde bly ry jy nie baie op ‘n Paas-naweek rond nie.

Ek hoop jy het ‘n heerlike naweek. Dankie vir die inloer/deelneem.

1

2

3

4

5

6

Stupid of onnosel!

Stupid en onnoselgeit is ‘n gegewe in vandag se lewe (kyk maar na die mense in beheer vir talle voorbeelde)  Die een sluit volgens my nie noodwendig die ander in nie en ek reken slim mense kan ook stupid goed doen.

Ek weet uit ondervinding ek is nou nie die skerpste potlood in die boks nie, maar ek het beslis heelwat helder oomblikke.  Vandag vertel ek  egter van twee geleenthede waar ek sommer stupid en onnosel was.

1. Twee naweke gelede speel ek al te lekker op my game FB profiel (Ek het 3 profiele : Games, Hoof profiel en Fotoklub profiel) Skielik is daar by die boodskap blokkie ‘n boodskap (nogal van Facebook dat ek my password moet verander. Sug… dink ek julle is nou lastig… maar ek verander die inligting en hulle vra sommer sulke vragies.  Skielik maak ‘n skermpie oop wat my kredietkaart gegewens vra. Ek skrik my in ‘n ander bloedgroep in en maak alles toe. Nou plaas my anti-virus-program  baie getrou die waarskuwing soos op my hoofprofiel toe ‘n swaap  pronografie daarop geplaas het.  SUG … hoe stupid kan mens nou wees.
2. Sondagmiddag het ek ‘n afspraak met ‘n vriendin. (Gewoonlik laat weet jy jou bure as jy uitgaan,want bejaarde mense kwel mos oor jou) Ek besluit sommer om ‘n sms te stuur as ek daar kom. Toe ek egter ‘n  foon uit my handsak wou haal, vind ek net my sakrekenaar!  Ek en my vriendin het vreeslik gegiggel oor die stupidgeit, maar die bure het tot die matrone gebel en ‘n soekgeselskap saamgestel.  Ek kry gepas skaam, want so van stupid het jy nog nie van gehoor nie.

Doen jy ook soms sulke stupid goed?  SUG… nee wat miskien moet ons liewer glimlag.

Sondag kopies

Heerlike herfs dae hier.  Ons hoop op nog bietjie reën, maar volgens die weerburo is die moontlikheid skaars.

Aan al die onderwysers en kinders, ek hoop julle het ‘n heerlike rustydjie. As jy ry… veilig reis en geniet die vakansie en lang naweke.

Ek hoop daar is ietsie vir jou wenslysie en indien nie, hoop  ek dat jy ten minste sal glimlag.

Vrydag Byskrifte

Ons het heerlik reën gehad enis ongelooflik dankbaar.  Ons het ook ‘n reënmeter gekoop, want om soggens van ander afhanklik te wees of in jou nagklere na die reënmeter af te suiker, is ook nie ‘n opsie nie.

Hoop die weer is by jou ook net soos jy daarvan hou en dat jy ‘n heerlike langnaweek het. Hier is die paaie al besig. As jy iewers ry, is my wens dat jy veilig sal wees.  Dankie vir die deelneem/inloer.

1

2

3

4

5

6

 

Sondag kopies

Dis lekker om te sien dat sommige plekke heerlike reën gehad het. Ons is baie dankbaar. My een buurvrou gaan more Wildtuin toe … ons is groen van jaloesie, maar mis haar al klaar.

Ek hoop daar iets tussen die kopies wat jy in belangstel en indien nie dat jy ten minste sal glimlag. Geniet jou Sondag!

Waar gaan alles heen?

Ek is nie ‘n vreeslike ondersteuner van Deon Maas nie, maar sy skrywe in die week se Vrouekeur laat my saam met hom wonder. Hy praat oor die toestande in SA en raak belangrike aspekte aan waarvoor ek nie antwoorde het nie.

Ons sit agter hoë mure en bewe van vrees vir diewe en moordenaars. Maas sê dat bedrog en korrupsie die rykes ryker maak en die armes armer.  Wat my die meeste geraak het is die feit dat die mynbaas met ‘n Ferrari ry maar mynwerkers ondergronds doodgaan en naasbestaandes nou 6 maande sal moet wag voor hulle uitgehaal gaan word.  Hy noem ‘n voorbeeld oor veghonde wat vir my te grusaam is om oor te vertel.

Intussen kry die president ‘n verhoging wat my pensioen na ‘n tiener se sakgeld laat lyk. Ek wonder of dit ooit gaan verander? Van al die teenstand in die parlement kom daar net mooi niks. Wat help dit alles?  Dis of bose mense oral oorwin?

Sug… miskien moet ons liewer net glimlag en wag en kyk?

Dis ‘n ou  foto maar elke jaar met die Atgus giggel ek hieroor… skuus …