Sjoe, dit was nou vir my ‘n woeste week. Daar is darem ‘n wolkie in die lug en ons hou styf duime vas dat bietjie sal reën.
Dankie vir die inloer/deelneem. Jy kikker altyd my naweek op!
SKUUS EK SIEN NOU EERS DIE LAASTE EEN HET AL ‘N BYSKRIF – JAMMER!
1
2
3
4
5
6
Slegte Nuus:
1. Firefox gee die gees elke keer as ek ‘n hele blog geskryf het en dan is alles weg! Ek HAAT dit, want ek tik met 2 vingers.
2. My selfoon is nog stukkend. Ek kan oproepe maak, maar die sleutelbord werk nie en ek voel soos ‘n weeskind. Ek sit en wag vir Vodacom, want hulle het vir my een bestel. Ek weet nie hoe het mens vir baie jare sonder ‘n selfoon reggekom het nie.
3. Ek het Vrydag vir my ‘n wasmasjien gekoop en hoewel ons wasgoed hier gedoen word, is daar goedjies wat ek tot nou maar met die hand gewas het. My oue is Myngenoegen toe, want dit was ‘n bolaaier. Laat die masjien koppel en was gistermiddag al te lekker. Die aand is daar bietjie water op die vloer en ek gooi ‘n handdoek op die vloer en vergeet daarvan. Vanoggend toe ek opstaan swem(sic) my ou besittinkies amper by die voordeur uit. Ek stort so vinnig soos weerlig en draai die stopkraan toe (JAAAAAA ek weet mos van die wasmasjien kraan, maar het bietjie vergeet) Bel en Morné kom gou help – al die drade en uitlate is droog- ons toets hom en die water loop aan die kant en voor uit. Jaag Makro toe … geen moeilikheid almal baie vriendelik. Binne 10min reël hulle om more die masjien te kom omruil. Dis lekker as mens sulke goeie diens op ‘n plek kry.
4. Lyk my ons gaan weer onder die begroting kreun!
Goeie nuus:
1. Elke laaste Woensdag van die maand kom daar ‘n predikant na die Landgoed. Vandag het hy vir ons Nagmaal bedien en dit was werklik baie spesiaal. (Nee… as jy nie saamstem, vat verby. Jy is geregtig op jou mening, maar ek gaan nie stry nie)
2. Vandag het een van my oud-leerders ‘n blog begin. Ek is amper so opgewonde soos ‘n ouma met ‘n nuwe kleinkind. Sy is pragtige, funky en slim jonge dame en dit sal so lekker wees as jy bietjie by haar gaan inloer. Ek is so trots op haar soos ek op elke oud-leeder is wat onderwysers word. Ag nee, ek jok … ek is baie trots op die kinders wat iets moois met hulle lewens doen. https://constantstateofholidayvibes.wordpress.com/
3. Het jy al geglimlag vandag?
Verlede week is een van die ou Mweb-bloggers oorlede. My hart is regtig seer. Sy was ook nie regtig baie oud nie. Ek onthou sy het ‘n troetelvarkie gehad en was ‘n opgewekte positiewe mens. Alhoewel sy nie meer geblog het nie, sal sy beslis gemis word.
Ek het in 2005 begin blog op Mweb en baie voorbarig allerhande uitdagings begin. Ek het baie harde lesse geleer, maar wonderlike mense ontmoet. Daar was baie pret en ons het sommige nagte tot heel laat gekuier. Eish, daar was hewige gevegte. Mense kon heeltemal Anoniem kommentaar lewer – sjoe, ek weet nou nog nie hoe mense so met ander kan praat nie.
Intussen is daar al ‘n hele paar oorlede. Daar was ‘n baie siek vrou wat by haar ouers moes gaan woon en haar papegaai en hondjie moes agterlaat. Sy was so oneindig hartseer daaroor… Dan was daar Asjas… ek sal nooit haar laaste inskrywing vergeet nie. Ons het Roly ook daar ontmoet, soveel lewenslus en sy stem het ook verlede jaar stil geword. Koeitjie herinner my aan Barbara – hoe kon ek haar vergeet het! ‘n Regte hartsvriendin. Ten spyte van haar swak gesondheid het sy altyd ‘n bemoedigende woord vir ander gehad. ‘n Wonderlike mens.
Ek weet ons gaan almal eendag dood, maar vir nou herdenk ek die wat ons vooruit gegaan het. Dankie vir hoe julle my lewe aangeraak en beter gemaak het. Dankie vir elke gawe woordjie wat jy na my kant toe gegee het. Julle is/was almal spesiaal mense en ek sal julle nooit vergeet nie.
http://stylonica.com/sad-pictures-and-wallpapers/
Hoe goed ken jy jou kleinkinders? Weet jy bv. wat hulle gunsteling kleur/kos/fliek/stokperdjie is? Miskien moet ek begin deur te vra: Hoe goed ken jy jou kinders? (Vir sommiges gaan die vrae baie moeilik wees, want as julle bymekaar is, luister jy baie min en jy praat en praat en praat en almal moet luister?)
Ag kom ons glimlag maar… nee dit help nie om my te stenig as jy by elke geleentheid net oor jouself praat en nooit na ander mense luister nie.
Nou wie dink jy is verantwoordelik vir die hittegolf? Gelukkig het ons dakwaaiers, maar dit krap net die warm lug deurmekaar.
Dankie vir die inloer/deelneem. Ek hoop jy het ‘n heerlike naweek!
1
2
3
4
5
6
Vanoggend toe ek gaan pos uithaal, word ek met die gebruiklike “Hallo Tannie Hoe gaan dit?” deur die karwag (Rokende vroutjie van ongeveer 40) en die Postnet klerk (‘n Rokende vrou van my ouderdom) begroet. Ek groet vriendelik terug en vra na hulle welstand. Daarna vertel die Postnet dame die slegte nuus dat die poskantoorwerkers weer Maandag gaan begin staak! Ag nee, hier gaan ons al weer!
Miskien moet ons liewer maar net glimlag.
Tinatjie leer mos nooit nie! Ek gaan kuier sonder batterylaaier, want ek het mos ‘n spaar battery. Die battery is pap en toe ek die spaar een insit is die ook pap. Ek het toe gelukkig ‘n ekstra media kaart wat ek in vriendin se mik-en-drukkie insit. Ai mens raak darem jou eie kamera gewoond. Woensdagoggend is ons toe na die vlooimark langs die Kolonade (my vriendin praat van die Pakistani) daar kry ons die oulikste batterylaaier vir ‘n skamele R40 Dit het ‘n + en – punt wat kan skuif en so kan jy enige battery daarmee laai. Die gaan beslis in die vervolg in my kamera sak saam.
Woensdag is ons toe na Margaret Roberts se plaas toe wat net Woensdae oop is. Eish dis alles mooi daar maar daar gaan regtig nie vreeslik baie aan nie. Daar is ‘n lekker teetuin en seepwinkeltjie. 
Daar is tot ‘n oulike kapelletjie.
Ons is ook verby Jo Roos se plaas verby maar ek dink die gallery is nie in die week oop nie. Een van die Tannies hier het ‘n Jo Roos en ek het Mnr Google geraadpleeg en die prys het my asem weggeslaan – selfs Norbert sou beïndruk gewees het.
Daarna het ons om die dam gery en ek het dit nog nooit so groen gesien … dis ‘n vreemde sieklike groen kleur! Weet jy dalk wat daar aan die gang is? Ons het middagete by Jasmyn geëet – regte Hollandse kroketten Dit was regtig lekker, waarna ons na hartelus geshop het!
Dit was nou regtig ‘n baie lekker kuiertjie gewees. Dankie H jy is voorwaar ‘n vriendin duisend!
Dinsdag het ons die pad aangepak Cullinan toe. Ons het met die Witbanksnelweg gery, want daar was glo klipgooiery op die ander pad. Dis tog jammer dat baie van die winkeltjies toe is in die week. Ek sou baie graag in die silwersmit se winkel wou inloer.
Die eerste winkeltjie was ‘n galerytjie Studio 14 van Norbert Schling . Die man lyk sommer soos die buurman maar sy kunswerke het my regtig geraak. Ek dink dit is veral sy kleurgebruik wat my sterk aanspreek. As jy meer van hom wil weet gaan loer hier – https://artavita.com/artists/4831-norbert-schling . Dis lekker as die kunstenaar teenwoordig is, hy het ons effe meer vertel, veral van die lande waar hy al uitgestal het. Hy is juis nou besig met ‘n reeks Afrika tonele vir ‘n uitstalling in die buiteland. Sug… as ek ‘n tog geldjie gehad het, sou ek beslis so ietsie gekoop het .
Daar is heelwat winkeltjie waar jy kaggelkakkies van elke kleur en geur kan koop. Hier op die landgoed is daar egter maar min plek vir iets nuuts en om ‘n geroeste blikkie/pot/blompot vir iemand anders te koop, is ook nie altyd veilig nie.
As jy nog nooit ‘n bobotie-pannekoek by Harrie’s Pancakes geëet het is daar ‘n tekort in jou opvoedingservaring! MMMMM skielik raak ek honger!
Ek het intussen uitgevind die dammetjie is in Zambezi Country Estate en wys nog ‘n paar van die inwoners. Dis so lekker skoon en lowergroen. Ek wens ons kan sulke grasperke hê. Hier is daar heelwat gras, maar eish soveel hobbels het jy nog nie gesien nie. Wel duidelik sal dit doen vir ‘n Golf Landgoed nie.
Hierdie skapies hou toesig oor die dammetjie!
Ek is terug van ‘n heerlike kuiertjie by ‘n vriendin. Dis altyd die lekkerste kuierplek want mens kom op allerhande onbekende plekke en kry kans om ook op bekende plekke in te loer.
Dinsdag laatmiddag het ‘n vriendin ons na hulle dammetjie geneem om na die swane te gaan kyk. Ons moes ‘n rukkie wag want hulle was nêrens te siene, maar toe hulle aankom was dit soos ‘n koninklike optog. Sjoe, hulle is pragtig en baie groter as wat ek gedink het.
Ek deel graag ‘n paar foto’s met jou:
rondomtaliedraai 